Feðgarnir Bergur Jónsson og Jón Bergsson á Ketilsstöðum hafa alla tíð verið í samstarfi í hrossaræktinni allt þar til hann lést í sumar síðastliðið. Jón var eins og Bergur fæddur inn í hestamanna fjölskyldu. Móðurafi hans Hallgrímur átti mikla gæðinga og má þar helst nefna Fálu 1286 frá Úlfsstöðum. Hún var móðir Ljónslappar frá Ketilsstöðum, sem er formóðir allra hrossanna á Ketilsstöðum og var hún fædd árið 1939.

Ljónslöpp átti aðeins sex afkvæmi, það fyrsta 1954 þá 15 vetra gömul. Undan henni urðu þrjú hross eftir í ræktuninni að Ketilsstöðum en það voru hryssurnar Rauðka, Ljóska og hesturinn Glói, öll alsystkini undan Lýsingi 409 frá Voðmúlastöðum. Ketilsstaðaræktunin hefur sótt blóð víða að, svo sem til Ófeigs frá Hvanneyri, Hrafns frá Holtsmúla og Gusts frá Hóli að ógleymdum hrossum Sveins Guðmundssonar frá Sauðarkróki.

Allar hryssur Olil Amble eru skyldar og ættaðar frá Jóhannesi Stefánssyni frá Kleifum. Hennar ræktun hófst árið 1986 og margar hryssur voru tímabundið í ræktuninni og reyndust ekki nógu vel og voru því settar af. Þegar búið var að grisja hópinn voru þær sem eftir voru allar undan eða út af tveimur hryssum frá Kleifum, þeim Spurninu og Muggu. Báðar eru þær undan dætrum Loga frá Kletti. Í dag eru þau Bergur og Olil með í ræktuninni 22 hryssur, þar af 6 af Kleifaætt og 16 frá Ketilsstöðum. Síðastliðið sumar voru tamin og sýnd fyrstu hrossin þar sem þessir tveir stofnar koma saman en það voru Álfasteins afkvæmin Djörfung, Ljóni og Snerra frá Ketilsstöðum.  Öll fjögra vetra gömul með meðaleinkunn uppá 8,00. Þessi útkoma hvetur vissulega til áframhaldandi blöndunar þessara tveggja stofna.

Hér til hægri í valmyndinni er að finna þá stóðhesta og hryssur sem við höfum ræktað.